أحداث الجمعة 9/9 #IsraeliEmbassy #Sep9

أعتقد إن الامن الوطني بدأ الأحداث أمام الوزارة وزق ناس يحركو الأحداث عند السفارة بمعاونة الجيش وبعدين ولع في مديرية الأمن:- ‎

من يومين تلاتة ‎@waelabbas‏ حذر من خطط الداخلية اللي اتسربتلو، والنهاردة الجيش كان مأمن مساكن الظباط في الرماية تأمين شديد جدا (أنا معرفش الوضع بالنسبة لباقي مساكن الظباط) وده بيأكد النقطة الأولى من كلام وائل:

وشوفنا امبارح فيديو عربيات الأمن المركزي تنزل ناس بلبس مدني عند المتحف :
http://www.youtube.com/watch?v=A85ti9OjDGU

-النهاردة واحنا رايحين التحرير عدينا من شارع مجلس الشعب جنب وزارة الداخلية، لقينا الألتراس رايحين عليها، ركنا ونزلنا رحنا معاهم، والشهادة لله هما محدفوش حتى طوبة على مبني الوزارة لكن كانو بيغنو الأغاني الحماسية بتاعتهم اللي فيها شتيمة في العادلي والظباط، وفيه جزء من الأغاني دي أنا عملتله برود كاست بعد كدة أما رجعنا كلنا عالميدان هحاول أبقى أحط اللينك بتاعه هنا، المهم بعد فترة طويلة جدا واحنا في الميدان عرفنا من مهند إن فيه قلق عند الوزارة فرجعنا على هناك لقينا ناس عمالة ترمي طوب على مبنى الوزارة وبيرزعوا جامد قوي عالأبواب وكان فيه ناس بيبصوا من مبنى الوزارة أما جيت أصورهم دخلوا جوة لما شافوني بالكاميرا بالزوم، مافيش إلا واحد بس فضل تقريبا كان عسكري مالوش في حاجة

النهاردة  @MohannadGalal‏ صور اتنين مختلطين بالناس عاملين خناقة وشغب عند الوزارة ولما الحريقة حصلت جوة ندهو عليهم ودخلوا جوة الوزارة:

النهاردة ‎@Samireshra‏ قال انه شاف الجيش شاب الناس تطلع السفارة لحد ماتصورو، وبعدين أكد إن الداخلية هم اللي ولعو المديرية 

 وبعدين @Samireshra‏ بعتلي الأبديت ده:

-ممكن نتخيل إن فيه عوامل محفزة وتسخين من بعض العملاء لتوجيه بعض الناس للسفارة وإشعال الشرارة الأولى لزيادة الاعداد.

-وادي كمان فيديو لواحد كان هناك في السفارة بيقول في الدقيقه 1.15 ثانية أحنا سلمنا كل حاجه للجيش الجيش دي القيادة بتاعتنا:

http://www.youtube.com/watch?v=7fTcadEUeUU&feature=share



-وادي كمان شهادة من @Shalabawi اللي كان هناك:
http://shalabydiaries.blogspot.com/2011/09/blog-post.html
 وده جزء منها :
"

أخيرا و ليس آخرا ما حدث ليل التاسع من سبتمبر هو ما تم تحذيرنا منه و هى مواجهة البلطجية، و لكن اليوم كانت مواجهة من نوع خاص بأن تراشقوا معنا فى الصفوف و بدأوا في استفزاز الشرطة، بالطوب و المولوتوف ، و تطور الأمر أن أطلق أحدهم - بينما أنا واقف فى جبهة الشرطة - علينا طلقة خرطوش فأصابتنى في خدى الأيسر و أصابت جندي بجوارى في كتفه.

هذه شهادتي علي هذا اليوم ،"




-ودي شهادة @manoly252011  اللي برده كان موجود عند السفارة من 10 بالليل:
manoly-manoly-mido

وده جزء منها: "
كان فى حوالى 4فى الدور الرابع من فوق فى العمارة اللى فيهاالسفارة واقفين بأعلام مصر , بدأنا نلاقى ورق بيترمى من الدور دة بعض يخص السفارة ,منه ورق رخصة حيازة سلاح للملحق بالسفارة.. وبعضه ورق فاضى ملوش أى لازمة

سمعنا صوت ضرب فى الهوا ولقينا دخان كبير كتير طالع من ناحية سفارة السعودية روحت هناك لقيت الامن المركزى اللى فى الشارع اللى جنب السفارة مش موجود ولقيت ناس خارجة من الشارع وبتقول عربيتين امن مركزى اتحرقو ولقينا الجيش خارج بيخرج الناس من الشارع دة ووقف عند سفارة السعودية بيحمى السفارة

رجعت تانى عند الكوبرى سمعت ان فى حرق عربيات عند مديرية أمن الجيزة وبيقولو ولعو فى عربيات امن مركزى هناك
كانت الساعة تقريباوصلت 1 الصبح سمعنا صوت قنابل غاز بتضرب من الشارع اللى فيه سفارة السعودية نزلت من الكوبرى ووقفت فى الشارع اللى فى وش سفارة السعودية لقينا الناس بترجع تجرى وفى ضرب كتير من الامن المركزى وناس كتير بتجرى"

-ده سردي لشهادات الناس وشهادتي وتحليلي البسيط لأحداث اليوم، أنا كنت حسن النية وقلت الأمن الوطني ومقلتش المخابرات عشان أنا قلبي طيب وحنين والله المستعان...

الله..الوطن