مظاهرات الجمعة 27 مايو، لماذا؟ حوار مع صديق

• أنا هعمل كوبي وبيست لحوار مع صديق لي بعد أن كتبت عن مظاهرات يوم الجمعة 27 مايو:

-الصديق: كلام فارغ حرام عليكم بقى خلونا نركز في شغلنا البلد حالها واقف

أنا: أنا عايز أسألك سؤال: هل شاركت في أي من أحداث ثورة يناير؟

الصديق:  طبعا شاركت وكنت بنزل رغم كل الناس اللي كانت بتقولي خلاص مش هيترشح والكلام ده

أنا:  طيب هل إنت شايف إن اللي كنت بتنزل عشانه اتحقق؟

الصديق:   طبعا اتحقق المطلب الاول كان التنحي والتاني كان حل مجلس الشعب والشورى والتالت كان تغيير الدستور وتم عمل استفتاء والناس قالت نعم ولازم نمشي مع الاغلبية والمطلب الرابع محاربة الفساد ومحامتة ومحاكمة قتلة المتظاهرين وانا شايف ان كل ده اتحقق ولا ايه؟

أنا: طيب بدل إنت مطالبك إتحققت ممكن متنزلش، لكن أنا مثلا عندي مشكلة مزمنة مع قانون الطواريء وعندي مشكلة مع محاكمة المدنيين عسكريا وعندي مشكلة مع ترك البلطجية يعيثوا في الأرض الفساد مع تقاعس الداخلية.

الصديق: مدنيين مين اللي بتحاكموا عسكربا البلطجية هم اللي بيتحاكموا عسكريا وبعدين طوارئ ايه يا احمد ده البلد فلتانة هو قانون الطوارئ متطبق انا شايف ان النزول المرة دي ضد مصلحة البلد بدل ما ننزل نركز في الشغل وننتج وبعدين يا جماعة اللي حصل في 4 شهور ده كتير جدا ولازم نصبر لان اللي باظ في 30 سنة مش هيتصلح في 4 شهور ولا حتى 4 سنين يا ريت بدل ماننزل يوم 27 ده نروح الشغل ننتج  

أنا: 

• مدنيين كتير بيتحاكمو عسكريا منهم مايكل نبيل المدون اللي خد حكم بالسجن ثلاث سنين وآخرهم طارق شلبي المدني وممكن ترجع للأخبار عشان تعرف، ومن يومين النيابة العسكرية طلبت بثينة كامل المدنية للتحقيق
• أما بالنسبة للشغل فأنا معاك يا ريت كلنا نركز في شغلنا فعلا وعشان كدة عاملين المظاهرة يوم الجمعة أجازة ويا ريت لو حد عنده شغل الجمعة بلاش يتظاهر.
• أما وقفان حال البلد دة فبسبب الانعدام الأمني ودة هو اللي أنا هندد بيه إن شاء الله في المظاهرة السلمية القانونية يوم الجمعة، إحنا عايزين الأمن يرجع تاني، لازم الشرطة ترجع تنزل الشارع تاني عشان تحمي الشعب. لازم تعرف إن فيه ناس كتير مش قادرة تمارس عملها بسبب انعدام الأمن خاصة على الطرق السريعة والعاملين في مجال النقل ممكن يحكولك، والحاجة الغريبة هي إن رغم إننا وقفنا المظاهرات من ساعة ما شرف مسك إلا إن الحالة الأمنية لا زالت سيئة للغاية إذن مش إحنا المسئولين عن سوئها، وأنا أرى تقاعس أمني في بعض الحالات مثل ما حدث في أحداث إمبابة في حين أجد وجود أمني في أحيان أخرى مثل ما حدث أمام سفارة إسرائيل، إذن هناك إمكانية للتواجد الأمني فليتواجد، وهذا ما يجب التأكيد عليه خلال المظاهرة السلمية القانونية يوم الجمعة إن شاء الله.